15 сакавіка ў Віцебску, у памяшканні культурна-рэлігійнага цэнтра катэдральнага касцёла Езуса Міласэрнага, адбылася чарговая штомесячная сустрэча «Кожны талент ад Бога». У розныя часы яе гасцямі былі многія вядомыя на Віцебшчыне і ў Беларусі творцы: пісьменнікі, музыкі, мастакі, прадстаўнікі іншых творчых прафесій. Не сталася выключэннем і сустрэча сакавіцкая. Як заўсёды, з прывітальным словам звярнуўся да прысутных пробашч парафіі кс. Адам Дынак. Ён адзначыў ролю лепшых узораў мастацтва ў духоўным узрастанні чалавека, іх дзяцей і моладзі ў рэчышчы наследавання Божым запаветам. Затым удзельнікі спаткання ўшанавалі хвілінай маўчання пісьменніка Аркадзя Нафрановіча, які жыў у вёсцы Камаі Пастаўскага дэканата і адышоў у вечнасць у гэты дзень. Стваральнік і натхняльнік гэтых сустрэч, вядомы віцебскі празаік Франц Сіўко, прадставіў гасцей. Адным з гасцей сустрэчы стаў вядомы скульптар, сябра Беларускага саюза мастакоў Валерый Магучы, удзельнік персанальных і калектыўных выстаў у Віцебску і Мінску, Санкт-Пецярбургу і Германіі, аўтар помнікаў паэтцы Еўдакіі Лось, мастаку Марку Шагалу, музыказнаўцу Івану Салярцінскаму, шэрагу бюстаў і мемарыяльных дошак (у тым ліку знакамітаму земляку Васілю Быкаву), памятных медалёў. Валерый Магучы распавёў пра нюансы працы над сучасным гербам Віцебска «Езус-Збаўца», падзяліўся сакрэтамі прафесіі, распавёў пра свае творчыя планы. Потым выступілі літаратары: паэтка і празаік Стася Наркевіч, паэты Міхась Мірановіч, Людміла Сіманёнак і Наталля Салаўёва. Іх прасякнутыя любоўю да бліжняга, да прыроды, да Бога творы нікога не пакінулі абыякавым, і ў перыяд перажывання Вялікага посту якраз сталі добрай падставай для разважання над сэнсам і пакутамі Езуса. Знайшлося падчас сустрэчы месца і музыцы. Гітарыст Васіль Харэвіч распавёў пра гісторыю і паходжанне свайго музычнага інструмента, выканаў некалькі твораў з класічнага рэпертуару. Як пасля ў размове пры гарбаце адзначылі некаторыя слухачы, падчас ягонага выступу нібы анёлы прамаўлялі ў зале з нябёсаў — так хораша ўпісалася цудоўная музыка ў зычлівую, узнёслую атмасферу паяднання ўдзельнікаў і гасцей сустрэчы ў мастацтве з Богам. У адпаведнасці з планам працы культурна-рэлігійнага цэнтра пры катэдральным касцёле Езуса Міласэрнага ў Віцебску адбылася экскурсія па адметных мясцінах горада. Яе пачаткам стала наведванне адной з самых старых з наяўных у абласным цэнтры каталіцкіх святыняў – касцёла святой Барбары. Пра гісторыю храма, перыпетыі яго лёсу, дзень сённяшні распавёў удзельнікам экскурсіі пробашч парафіяльнай супольнасці касцёла а. Крыштаф Коцян ОР. Другім пунктам маршруту сталі Старасямёнаўскія могілкі, дзе побач з фрагментам цаглянай брамы ХІХ стагоддзя сёння месціцца сімвалічная магіла пахаванай дзесьці ў лютэранскай частцы кладоў Дарты Пліекшан, маці класіка латышскай літаратуры Яна Райніса, голас якога неаднойчы гучаў у Латвіі ў 20-я гады ў абарону правоў беларускай нацыянальнай меншасці і чый прыезд у 1926 годзе ў Віцебск на адкрыццё БДТ-2 (цяпер тэатр імя Якуба Коласа) яскрава засведчыў прыхільнасць знакамітага латыша да Беларусі. Пра ўсё гэта і пра іншыя адметныя куткі самых старых у горадзе могілак распавялі прысутным былы дырэктар Віцебскага літаратурнага музея Святлана Казлова і пісьменнік Франц Сіўко. Самай змястоўнай у праграме экскурсіі стала вандроўка па цэнтры Віцебска, якую правёў захоплены мінуўшчынай і хараством родных краявідаў чалавек, шматгадовы старшыня гарадской суполкі Таварыства беларускай мовы Валянцін Арлоў. Яго шчодра ілюстраваны фотаздымкамі аповед пра касцёлы, цэрквы, сінагогі горада, даўнейшыя і сённяшнія, адлюстраваў не толькі верацярпімасць многіх пакаленняў віцяблянаў, але і іх здольнасць да аднаўлення веры, адраджэння хрысціянскіх каштоўнасцяў. Зміцер Шыловіч, AG 1 лістапада пасля летніх канікул у культурна – рэлігійным цэнтры віцебскага катэдральнага касцёла Езуса Міласэрнага, адбылася чарговая штомесячная сустрэча “Кожны талент ад Бога”. Як заўсёды, з прывітальным словам да прысутных звярнуўся пробашч парафіі кс. Адам Дынак. Ён прывітаў усіх і пажадаў усім добрага вечара і адпачынку. Стваральнік гэтых сустрэч, вядомы віцебскі празаік і журналіст Франц Іванавіч Сіўко, прадставіў гасцей. Першым перад прысутнымі выступіў вядомы у Віцебску гітарыст Уладзімір Бярэзін. Ён выканаў творы класічнага рэпертуару. Усе слухалі затаіўшы дыханне. Потым слова узяла кіраўнік дзяржаўнага тэхналагічнага коледжу Наталля Анісковіч, часты госць гэтых сустрэч. Яна прадставіла сваю вучаніцу – Анастасію Даргель, майсцярыцу вырабаў з саломкі. Яны паказалі невялікі фільм аб коледжу. Пазнаёмілі прысутных з вырабамі Анастасіі і другіх вучняў коледжу. Што вельмі зацікавіла усіх. Наступнай выступіла пісьменніца і ўрач гарадской бальніцы хуткай дапамогі Вольга Грэдзель. Яна прадставіла слухачам сваю кнігу “Амазонка со “Скорой”. Прачытала некалькі урыўкаў з яе. На прыканцы сустрэчы жадаючыя маглі набыць гэту кнігу з аўтографам пісьменніцы. Франц Сіўко прадставіў таксама і дачку Вольгі – Таццяну Грэдзель. Таццяна выдатны чалавек. Яна вучылася ў школе мастацтваў і у інстытуце журналістыкі БДУ. Грае на гітары і фартэпіяна, выдатна спявае. Пасля вучобы яна з’ехала ў Пецярбург, дзе грала ў рок –гурце “Мулінэ”. Зараз Таццяна Грэдзель / Тензін Лхадзе,адзіная з Беларусі будыйская манашка – гецула, жыве і вучыцца ў Дхарма–сіці, цэнтры Патрула Рінпочэ ў Бельгіі. Свае манаскія шлюбы складала ў Яго Святасці Далай Ламы. Хоць Таццяна, вучачыся ў будыйскім цэнтры, размаўляе на ангельскай і тыбетскай мовах, але яна не забыла роднай беларускай. І вершы піша як на ангельскай так і на беларускай мовах. На гэтай сустрэчы яна прачытала некалькі сваіх твораў. Напрыканцы спаткання зноў выступіў гітарыст Уладзімір Бярэзін. Усе, хто быў на чарговай сустрэчы “Кожны талент ад Бога”, засталіся вельмі задаволенны такімі цікавымі і разнастайнымі гасцямі. Бо з кожнай такой сустрэчы чэрпаеш для сябе штосці новае і цікавае. А гэта галоўнае.